Kalkylar for frukt og bær på nett
Dei første kalkylane vart laga i samband med eit samarbeidsprosjekt mellom dåverande Norsk institutt for landbruksøkonomisk forsking (NILF*) og fleire andre aktørar innan fruktnæringa for å stimulere til auka produksjon av økologisk frukt. Etter kvart er fleire nye kalkylar for ulike produksjonar komne til via nye prosjekt med ulike finansieringskjelder.
Kalkylane er basert på data frå praktiske fruktbruk og data frå forsøksfelt. Den enkelte kan velje nivå for pris og avling og justere innsatsfaktorar etter lokale forhold. Tilskotsdata ligg inne i kalkylane, og er baserte på ordningar og satsar frå siste jordbruksoppgjer, justerte kvart år om lag 1. juli. Prisar på innsatsfaktorar er basert på data frå nokre driftsmiddelleverandørar, og vil variere mellom ulike forhandlarar. Det ligg inne satsar som er tilrådde for dei ulike kulturane. Desse kan nyttast som eit hjelpemiddel på generelt nivå. Rådgjevarar og dyrkarar må leggje inn nivå som er aktuelle for kvart enkelt bruk. Fruktforskinga og rådgjevingstenesta har vore med på å laga resepten for dei ulike kalkylane.
Kalkylane kan nyttast til mange formål. Det spesielt i samband med planlegging av nye felt dei er nyttige. Dei kan brukast til samanlikning mellom ulike produksjonar, til dokumentasjon for søknader om tilskot og til vurdering om sanering av eldre felt løner seg eller ikkje. Aktuelle brukargrupper er dyrkarar, rådgjevarar, forvaltinga, takstfolk og andre som har behov for kalkylar. Dei kan også brukast til undervising. Etter kvart er det tenkt at kalkylane vil erstatta papirversjonen av Handbok for driftsplanlegging, utgjeven årleg av NIBIO.
* Frå 1.juli 2015 er NILF fusjonert med Bioforsk og Skog og landskap til Norsk institutt for bioøkonomi (NIBIO)
Info om endring i oppsett og utrekning av bardunsystem (05.03.2013)
